13-25 мамыр аралығында Шымкентте екінші жыл қатарынан Asia/Oceania Final Qualifying Juniors Davis Cup және Juniors Billie Jean King Cup іріктеу турнирлері өтеді. Жарысқа Азия/Океания аймағынан 16 жасқа дейінгі ең мықты жасөспірімдер қатысады.
Турнирге Қазақстаннан бөлек Аустралия, Жапония, Оңтүстік Корея, Қытай, Үндістан, Қытай Тайбэй, Гонконг, Иран, Индонезия, Жаңа Зеландия, Өзбекстан, Иордания, Малайзия, Тайланд, Вьетнам және Шри-Ланка командалары қатысады.
Өткен жылы Дэвис Кубогында және Билли Джин Кинг кубогында Қазақстанның жасөспірімдер құрамалары сәтті іріктеуден өтіп, Қазақстан теннис тарихында алғаш рет 16 жасқа дейінгі жасөспірімдер арасындағы командалық әлем чемпионатының финалдық кезеңіне жолдама алған болатын.
Әр турнирдің іріктеу кезеңінде төрт топқа бөлінген 16 команда өнер көрсетеді. Әр топтан екі үздік команда плей-офф кезеңіне өтеді. Олар командалық әлем чемпионатының жолдамаларын сарапқа салады. Биылғы жылы Азия/Океания елдерінен келген ұлдар мен қыздарға төрт орын беріледі, ал жартылай финалистер әлем чемпионатына автоматты түрде жолдама алады.
Billie Jean King Cup Juniors/Davis Cup Juniors Халықаралық теннис федерациясы (ITF) өткізетін 16 және одан кіші жас тобындағы жасөспірімдер арасындағы теннистен бірінші командалық турнир. Турнирлерге қатысқан атақты кәсіпқой теннисшілер қатарында хорват Горан Иванишевич, америкалық Джим Курьер, Майкл Чанг және Энди Роддик, голландиялық Ричард Крайчек, ресейліктер Евгений Кафельников, Марат Сафин, Даниил Медведев, Андрей Рублев, бразилиялық Густаво Куертендер бар.
