16 жастағы қазақстандық теннисші Әмір Омарханов (жасөспірімдер рейтингінде №13) мансабында алғаш рет ATP Masters 1000 сериясының ересектер турнирінде өнер көрсетті (Испания). Онда ол испаниялық Роберто Баутиста Агутоммен (№ 86) матч өткізді. Бұл тәжірибенің жас қазақстандық теннисші үшін маңызына тоқтала кетсек.
Болашағынан зор үміт күттіретін қарағандылық үшін Мадридтегі турнир оның ATP 1000 жарыстарындағы дебюті ғана емес, жалпы ATP деңгейіндегі алғашқы тәжірибесі болды. Омархановтың әлі ATP рейтингі жоқ. Бірақ ол жасөспірімдер арасында 13-орынға ие болып, әлемнің үздік 15 жасөспірімінің қатарына кіреді.
Қаңтар айында ол сенсация жасап, жасөспірімдер арасындағы Australian Open турнирінің ширек финалына шықты. Осыдан кейін бірден Әмір Оңтүстік Америка мен Еуропада төрт турнирде ойнап, маусымның топырақ төсенішті корттарда өтетін турнирлеріне көшті. Осы уақыт ішінде теннисші төрт жеңіске жетіп, сонша матчта жеңіліп қалды. Ең жақсы нәтиже Парагвайдағы турнирдің жартылай финалында өнер көрсетуі болды.
Бірақ маусымның көктемгі бөлігінде елеулі табыстарға қол жеткізбесе де, Омарханов Мадридтегі беделді турнирді ұйымдастырушылардың назарын аударып, олар жас теннисшіге өзін осындай жоғары деңгейде көрсетуге мүмкіндік беруді жөн санады. Ол іріктеу кезеңіне арнайы шақыру алды. Жеребе нәтижесі бойынша бірінші раундта Уимблдон 2019 жартылай финалисті, 36 жастағы Баутиста Агутпен сынға түсті.
Иә, Робертоның мансабындағы ең жарқын сәттер артта қалды. Бірақ ол әлі де үздік 100 ойыншы қатарында және ең ірі жарыстарға, оның ішінде өз елінде өтетін турнирлерді жіберіп алмауға тырысады. Өкінішке қарай, ғажайып орындалмады. Омарханов ардагер теннисшіге 2:6, 1:6 есебімен есе жіберді. Соған қарамастан Әмір болашақта мықты ойыншылармен бәсекеге түсе алатынын көрсетті. Көп қателік жіберіп, қарсыласының ойынын жеңілдетті.
Омарханов жеңіліп қалса да, бұл тәжірибе оның әрі қарай ілгерілеуіне оң ықпалын тигізері сөзсіз. Енді оның өз бетімен жұмыс істеуге және қабілетін жан-жақты жетілдіруге деген ынтасы одан сайын арта түседі. Мұндай ірі турнирлерде тіпті іріктеу кезеңінде де алуға болатын ақшалай сыйақыны да ұмытпағанымыз жөн.
ATP мәліметінше, Әмір мансабында ресми түрде 156 доллар (69,4 мың теңге) табыс тапқан. Бірақ жасөспірімдер ITF Juniors турнирлеріне жеңіске жеткені және қатысқаны үшін ақша алмайды және онда тек ұпайлар беріледі. Ал Мадридтегі турнирге іріктеудің алғашқы кезеңі үшін ойыншыларға сыйақы ретінде 6,13 мың доллар төленеді (салықтарды қоспағанда). Бұл 2,73 млн теңгені құрайды. Осылайша Әмір әлемнің бұрынғы тоғызыншы ракеткасымен өткен матч үшін алғашқы миллиондарына ие болды деп айта аламыз.
