Шымкенттік «Ордабасы» ҚПЛ-2024 13-туры аясындағы ойында «Қайсарды» ұтты. Шымкентте өткен кездесу 2:1 есебімен алаң иелерінің пайдасына шешілді. Жетінші минутта Айбар Жақсылықов гол соққаннан кейін қонақтар бірінші болып алға шықты. Алаң иелері 54-минутта Өзбекстан құрамасының шабуылшысы Жасурбек Яхшибоев гол соғып, есепті теңестірді. 84-минутта Дембо Дарбо Ордабасыға жеңіс әкелді. Осылайша шымкенттік клуб 25 ұпай жинап, турнирлік кестеде көш бастады. 16 ұпайы «Қайсар» жетінші орында.
«Астана» бір гол салып, «Қайратқа» әжептәуір қарсылық көрсетті. Алматыда «Хан Тәңірі» стадионында «Астана» мен «Қайрат» арасында өткен матч 3:1 есебімен «Қайраттың» жеңісімен аяқталды.
28-минутта литвалық қорғаушы Кипрас Казуколовастың голынан кейін елордалықтар есеп ашты. Бір минуттан кейін Жоао Пауло есепті теңестіріп кетті. 67-минутта Әділет Садыбеков алматылықтарды алға шығарды. Ал 95-минутта Дмитрий Сергеев ойынның нүктесін қойды. Осылайша, «Қайрат» 21 ұпай жинап, үшінші орынға тұрақтаса, «Астана» 15 ұпаймен сегізінші орында.
Сондай-ақ 13-тур аясында аутсайдер командалар өзара мықтыны анықтады. Петропавлдың «Қызыл-Жары» мен қарағандылық «Шахтер» кездесті. Петропавл қаласында өткен кездесу 2:0 есебімен алаң иелерінің пайдасына аяқталды. Бірінші голды 56-минутта украиналық шабуылшы Алексей Щебетун соқты. 91-минутта грузин шабуылшысы Лука Имнадзе есепті еселей түсті. 13 ұпайы бар «Қызыл-Жар» оныншы орында қалса, жеті ұпай жинаған «Шахтер» ҚПЛ кестесінде13-орында тұр.
