63.5 келі салмақта өнер көрсететін Ұлттық құраманың ең жас спортшысы Мұхамедсабыр Базарбайұлы Париждегі Олимпиада ойындарының 1/8 финалында Ханчжоудағы Жазғы Азия ойындарының күміс жүлдегері Чу Ен Лайдан 3:2 есебімен басым түсті. Жекпе-жек аяқталған соң былғары қолғап шебері кездесуге қатысты өз пікірін білдірді.
«Екінші жеңісімен қол жеткізіп отырмын. Олимпиадаға осал қарсыластар келмейді. Барлығы мықты. Қарсыласым Азия ойындарында екінші орын алған, өте тәжірибелі боксшы. Дегенмен екінші жекпе-жек болған соң рингке бейімделіп, бапкерлер қойған тактикаларын, тапсырмаларын толығымен орындадым», — деді Базарбайұлы жекпе-жектен кейін.
Бірінші айналымда Мұхамедсабыр Испания өкілі Ойер Ибареччені жеңген болатын. Ширек финалдық жекпе-жек 1 тамыз күні өтеді. 1/4 финалда Базарбайұлы Лаша Гурулимен жұдырық түйістіреді.
