Париж Олимпиадасында брейкингтен өнер көрсеткен Әмір Закиров жейдесіндегі бейнеленген суреттің тарихы жайлы айтып берді.
«2019 жылы 11 желтоқсанда балалық шағым өткен үйде өрт болды. Атам шырт ұйқыда жатқанда қайтыс болды. Әкем 13 күннен кейін ауруханада көз жұмды. Оның денесінің 80 пайызын күйік шалған.
Бұл фотоны 4 жылдан кейін өрт болған үйге кіруге батылым жеткенде түсіріп, кейін жейдеме сол бейнені салғыздым.
Әкем жақсы әке болды деп айта алмаймын. Оның қателіктерінен бала кезімде тым көп қиындықтарды бастан өткердім және менің биім де сол жайлы. Мен сені кешіремін, әке. Бұдан былай ойым да, шығармашылығым да шарықтай түседі» — деп жазды Әмір өзінің instagram парақшасында.
Айта кетейік, 2023 жылдың ақпан айында Закиров Жапонияда өткен Breaking for Gold брейк-данс турнирінің жеңімпазы атанды. Жарысқа әлемнің 48 елінен 180 мықты брейк-дансерлер қатысты. Ал, биыл Парижде өткен Олимпиада ойындарында Әмір ширек финалға дейін жетті.
