Бүгін, 22 тамызда Қазақстан құрамасы футзалдан 2024 жылғы Әлем чемпионатына дайындық аясында бес жолдастық кездесудің алғашқысын өткізіп, құрамамыз Тәжікстанды 3:0 есебімен ұтты. Қазақстандық команда сапынан Біржан Оразов, Дәурен Тұрсағұлов және Ақжол Дәрібай гол соқты.
Бұл 2024 жылғы футзалдан әлем чемпионатына дайындық аясындағы бес жолдастық кездесудің алғашқысы. Командалар екінші матчын 24 тамызда өткізеді. Сондай-ақ Қазақстан құрамасы оқу-жаттығу жиыны барысында Аргентина мен Иранға қарсы ойнайды.
Әлем чемпионаты 14 қыркүйек пен 6 қазан аралығында Өзбекстанның үш қаласында – Ташкент, Бұхара және Әндіжанда өтеді. D квартетінде Рикардо Кака шәкірттері Испания, Жаңа Зеландия және Ливия құрамаларымен ойнайды.
Тәжікстан да әлем чемпионатының финалына жолдама алды. Оның Е тобындағы қарсыластары Португалия (қазіргі чемпион), Панама және Марокко құрамалары болмақ. Әр топтан үздік екі команда және үшінші орын алған төрт үздік команда плей-офф кезеңіне өтеді.
