Бүгін, 13 қазан Алматыда Almaty Open АТР 250 турнирінің іріктеу сайыстары басталды. Матчтар Almaty Arena корттарында өтуде. Жарысқа арнайы шақырту алған 16 жастағы Әмір Омарханов орталық кортқа екінші болып шығады.
Әмір бастапқы кездесуін дүниежүзілік рейтингіде кезінде 21-орынға дейін көтерілген, жекелей сында ATP турнирлерінің екі дүркін чемпионы, 2015 жылы Ұлыбритания құрамасы сапында Дэвис кубогын жеңіп алған Дэниел Эванспен өткізеді.
Қазақстандық тәжірибелі теннисші Михаил Кукушкин іріктеу сайыстарының алғашқы айналымында өзбекстандық Хумаюн Сұлтановты сынап көреді. Ал Денис Евсеев ливандық Бенжамин Хассанмен шеберлік байқасады.
Айта кетейік, ATP 250 Almaty Open турнирі негізгі кезеңінің ресми жеребе тарту рәсімі Алматыда теңіз деңгейінен 1700 метр биіктікте орналасқан Аюсай шатқалындағы визит-орталықта өтті.
