Келесі жылы Astana Qazaqstan Team сапында (2025 жылы) италиялық шабандоз Маттео Малучелли (31 жаста) жарыс жолына шығады.
Малучелли 2024 жылғы құрлықтық деңгейде маусымды тамаша өткізіп, 10 жеңіске жетті. Оның ішінде жақында аяқталған «Лангкави турында» үш кезеңде, «Жапония турында» және «Болгария турында» екі кезеңде мәреге бірінші болып келді.
«Мен үшін велоспортта тарихқа енген Astana Qazaqstan Team сияқты үлкен командаға қосылу үлкен мәртебе. Жеңістерге толы сәтті маусымнан кейін Әлемдік тур деңгейінде не істей алатынымды көрсетуге 100% дайынмын. Мен мансабымның келесі тарауын бастауға керемет мотивация алдым және Astana Qazaqstan Team жейдесін киюді тағатсыздана күтудемін», — деді Маттео Малучелли.
«Маттео Малучелли — әлеуеті зор әйгілі шабандоз. Маусымды сәтті өткізген велоспортшының әлемдік турда өзін көрсету мүмкіндігіне ие болғаны қисынды дүние. Малучелли Лангкави турында, оның алдында тағы да бірқатар жарыстарда керемет нәтижелерге қол жеткізді. Менің ойымша, мұндай мықты спринтердің келесі жылы біздің командаға зор пайдасы тиеді», — деді Astana Qazaqstan Team командасының бас менеджері Александр Винокуров.
