Елімізде кәсіби спортты мемлекеттік бюджет қаражаты есебінен қаржыландыруға қатысты жаңа ережелер ұсынылды. Заң жобасы бойынша, кәсіби клубтарды ұстауға мемлекет тарапынан қаржыландыру лимиттері белгіленетін болады. Бұл шара бюджеттік шығыстардың тиімділігін арттырады.
Заң жобасында тағы да бір маңызды өзгеріс бар: ҚР азаматтары болып саналмайтын спортшыларды мемлекеттік бюджет және квазимемлекеттік сектор субъектілерінің қаражаты есебінен қаржыландыруға тыйым салу.
«Бұл өзгерістер спорттық саладағы басқаруды оңтайландырып, қаржылық ресурстарды тиімді пайдалануға мүмкіндік береді. Біз жоғары жетістіктер спортына ерекше көңіл бөліп, кәсіби спорттың қаржыландыру жүйесін тұрақты әрі әділ етуді мақсат етіп отырмыз», – деді Туризм және спорт министрі Ербол Мырзабосынов.
Күні кеше кезекті отырыста депутаттарымыз да осы мәселені көтерді. «Самұрық-Қазына» қорының «Астана» велокомандасына неге қыруар қаржы жұмсайтынын депутаттар түсінбей, әлек болды десек артық айтқанымыз емес. Осы орайда Мұрат Әбенов елордалық велокомандаға қатысты тың ақпараттармен бөлісті.
«Еліміздің туын көтермейді. Қазақстанға келмейді. Олар Еуропада өнер көрсеткен соң, қайтып келмейді. Команданың 29 мүшесінен тек 10 шабандоз ғана Қазақстан азаматы. Біздің бауырларымыздың бір де бір фамилиясы жоқ. Мамыр айында тексеру жүргізіп, сыбайлас жемқорлыққа қатысты құқық бұзушылықтар анықталды. «Самұрық Қазына» қорынан 31 миллиард тенге қаржы бөлінген. Еліміздегі бұқаралық спортқа 35 миллиард тенге бөлінсе, тек шет елде ғана өнер көрсететін бір «Астананың» өзіне 31 миллиард тенге бөлінген. Соңғы 3 олимпиадада нәтиже көрсете алмады.Команда капитаны Токиода 21-нәтиже, ал Парижде 51-нәтиже көрсеткен. Қай уақытқа дейін қаржыландыруға болады?», — дейді депутат.
Жаңа заң жобасы күшіне енсе, ел азаматтарының спортта да, қаржылық қолдауда да басымдыққа ие болуын қамтамасыз етеді.
