Қараша айының 21-24 аралығында Италияның Бормио қаласында шорт-тректен Alta Valtellina Trophy халықаралық турнир өтті.
Жарыста ел намысын қорғаған Валерий Клименко күміс жүлдегер атанды. Спортшымыз 500 метр қашықтықта финалға шығып, мәреге екінші болып келді. Бірінші орында Франция спортшысы, қола жүлдені италиялық шорт-трекші еншіледі. Бұл финалда тағы бір спортшымыз Айбек Темірхан бесінші нәтиже көрсетті.
Тағы бір шорт-трекшіміз Нұртілек Қажғали 1000 метр қашықтыққа жүгіруден топ жарды. Ақтық сында Нұртілек Франция, Италия, Нидерланд елдерінің спортшыларын артта қалдырып, алтыннан алқа тақты.
Сондай-ақ эстафетада қазақстан ерлер командасы Нұртілек Қажғали, Айбек Темірхан, Валерий Клименко, Алишер Абулкатимов, Дамир Құрманов мәреге бірінші болып келіп, алтын жүлде еншіледі. Күміс жүлде Франция құрамасына бұйырса, үшінші орынға Италия ерлер командасы тұрақтады.
