«Астананың» қақпашысы Мұхаммеджан Сейсен елордалық клуб сапында Лига кубогы мен Конференция лигасындағы соңғы матчтарында тамаша өнер көрсетті. Бірақ оның келесі маусымдағы болашағы белгісіз. Елордалық клубтың бас бапкері Григорий Бабаян қақпашының келісімшарты мен келешегі туралы сөз қозғады.
Бапкер Сейсеннің Қазақстан құрамасының негізгі қақпашысы бола алатынын атап өтті.
«Мен Мұхаммеджанды бұрыннан білемін. Ол «Астанаға» ауысқанға дейін тіпті ұлттық құрамаға да шақырту алмаған еді. Бірақ, қазір оның жоғары деңгейде ойнайтынын білеміз. Қақпашыларды қалай дайындау керек екенін мен білемін. Болашақта Сейсен Қазақстандағы нөмірі бірінші қақпашы болады», — деді Бабаян.
Естеріңізге сала кетейік, Сейсен «Астанаға» биыл «Ордабасыдан» ауысып келген. Елордалық клуб сапында ол турнирлерде бес матч өткізді. 25 жастағы қақпашы кәсіпқой мансабын «Тараз» футбол клубынан бастаған.
