Қазақстандық футболшы Ғалымжан Кенжебек кипрлік «Акритас Хлоракас» командасында негізгі құрамда алғашқы ойынын өткізді. Екінші дивизионның екінші турындағы матчта оның командасы өз алаңында «Асил Лисиді» қабылдады. Қорытынды есеп 4:0. Кенжебек 22-минутта есеп ашса, 50-минутта командасының соңғы, төртінші голын соқты.
Бірінші гол соғылған жағдайда Ғалымжан айып алаңының шетінде допты қабылдап, қақпаға жойқын соққы бағыттаса, екінші голды да айып алаңының сыртынан соқты. Кенжебек үшін бұл жаңа клуб сапында өткізген екінші матч.
Айта кетейік, Ғалымжан Тараздың тумасы, «Қайрат» футбол клубының тәрбиеленушісі. Алдымен «Мақтаарал» сапында өнер көрсетіп, биылғы жылдың бірінші жартысын «Жеңіспен» бірге өткізіп, 14 кездесуде бір гол соқты.
Болашағынан зор үміт күттіретін жас талант Қазақстан жастар құрамасы сапында бес кездесуге қатысып үлгерді. Ол осы жазда еркін агент ретінде «Акритас Хлоракасқа» қосылды. Екі турдан кейін Кенжебектің жаңа командасы алты ұпай жинап, турнир кестесінде бірінші орынға ие болды.
